କୃତିତ୍ବ

✍କୃତିତ୍ବ✍

---

କୃତିତ୍ବ ହାସଲ କରିବାରେ ମନ
କାହର ନଥାଏ କୁହ
କୃତିତ୍ବ ହାସଲ କିଏ କରିପାରେ
କିଏ ପାରେନାହିଁ କୁହ ||

ମନ କଲେ ସବୁ ମିଳିଥାଏ କି ରେ
କେ କହିପାରିବ କୁହ
ଆଶା ସମୁଚ୍ଚୟ ଘୋଡା ହୋଇଥିଲେ
କିଏ ନ ଚଢନ୍ତା କୁହ||

ସଫଳତା ଲାଭ କିଏ କରିପାରେ
କିଏ ହୁଏ ଅସଫଳ
ସଫଳ ହେବାର ରହସ୍ୟ ନ ବୁଝି
ହେଉଥାଏ ଅସଫଳ||

ସଫଳତା ଲଭି କୃତିତ୍ବ ହାସଲ
ରହସ୍ୟ ବୁଝିବା ଆସ
ଜୀବନ ଯୁଦ୍ଧରେ ବିଜୟୀ ହୋଇବା
ବୁଝି ସଫଳ ରହସ୍ୟ ||

ମଣିଷର ମନ ଧାଏଁ ଅତିବେଗେ
ଆଲୋକ ତରଙ୍ଗେ ବଳି
କ୍ଷଣିକେ ଭାବଇ ଶିଳା ସ୍ରୋତ କଥା
କ୍ଷଣେ କୃଷ୍ଣ ଗର୍ତ୍ତେ ଚଳି ||

ସେଇ ଭାବନାକୁ ସଚେତନ ମନ
ଭାବୁ ଭାବୁ ଆଶା ଜାଗେ
ଇଚ୍ଛା ଜାଗେ ମନେ ପାଇବାକୁ କିଛି
ଭାବିବାକୁ ଭଲ ଲାଗେ ||

ପାଇବାର ଇଚ୍ଛା ମନେ ଭାବନାରେ
ଯେବେ ଆସେ ଘନ ଘନ
ଆରମ୍ଭ ହୁଅଇ ମଣିଷ ଜୀବନେ
ଦେଖିବା ସୁନେଲି ସ୍ବପ୍ନ ||

ଇଚ୍ଛାସବୁ କ୍ରମେ ସପନରେ ଆସି
ନିଦକୁ ଚୋରାଇ ନିଏ
ସେଇ ସପନକୁ ରାତି ଛୋଟହୁଏ
ସପନ ଅଧୂରା ରହେ ||

ଇଚ୍ଛାରୁ ସପନ ସପନରୁ ଲକ୍ଷ୍ୟ
ସ୍ଥିର ହେଲେ ନର ମନେ
ସେହି ଲକ୍ଷ୍ୟ କେହ୍ନେ ହାସଲ ହୋଇ

ଭାବେ ସିଏ ପ୍ରତି କ୍ଷଣେ ||

ଲକ୍ଷ୍ୟ ହାସଲର ସପନ ଆସଇ
ଶୟନେ ବା ଜାଗରଣେ
ସେଇ ସପନକୁ ସାକାର କରିବା
ଚିନ୍ତା ଜାଗେ ପ୍ରତି କ୍ଷଣେ ||

ଲକ୍ଷ୍ୟ ହାସଲର ସ୍ବପ୍ନ ଦେଖିବାକୁ
ଦିନ ରାତିଛୋଟ ହୁଏ
ସେଇ ସପନରୁ ଲକ୍ଷ୍ୟ ହାସଲର
ଝାପ୍ସା ପଥ ଦେଖାଦିଏ ||

କେଉଁ ପଥ ଦେଇ କିପରି ଯିବାକୁ
ହୋଇବ ଯୋଜନା କରି
ଯୋଜନାନୁସାରେ ସୋପାନର ପରେ
ସୋପାନ ଚଢିଲେ ପାରି
ଯୋଜନାବଦ୍ଧ ସେ କ୍ରିୟା କଳାପର
ଠିକ୍ ପଥ ଅନୁସରି
ସଫଳତା ଲାଭ ଦିଗେ ଅଗ୍ରସର
ହୁଏ ନର ଥିରିଥିରି ||

ଲକ୍ଷ୍ୟ ହାସଲର କ୍ରିୟା କଳାପରେ
ଯେତେ ବାଧାବିଘ୍ନ ଆସୁ
ଯେତେ ପ୍ରତିକ୍ରିୟା ଯେତେ ପ୍ରତିବାଦ
ଯେତେ ନିନ୍ଦାଗାଳି ଦିଶୁ ||

ଦୁଃଖ ଅବଶୋଷ ପଛରେ ପକାଇ
ସ୍ଥିତପ୍ରଜ୍ଞ ଭାବ ମନେ
ଦୃଢ ପ୍ରତିଜ୍ଞ ଓ ଆତ୍ମ ବିଶ୍ବାସର
ଅଭାବ ନ ରହୁ ମନେ ||

ଯେତେ ଝଡଝଞ୍ଜା ଆସିଲେ ଜୀବନେ
ଯିବନାହିଁ କେବେ ଡରି
ଦୃଢ ମନୋରଥେ ସଂକଳ୍ପେ ଅଟଳ
ଅଚଳ ଯେସନ ଗିରି ||

ଦୃଢ ମନୋବଳ ଆତ୍ମ ବିଶ୍ବାସରେ
ଯୋଜନାନୁସାରେ କାର୍ଯ୍ୟ
ପ୍ରବଳ ଇଚ୍ଛାରେ ସପନ ଦେଖିବ
ସ୍ଥିରୀକୃତ ଲକ୍ଷ୍ୟ ଧାର୍ଯ୍ୟ ||

କଠିନ ଶ୍ରମର ଗୁରୁତ୍ବକୁ କେବେ
ଯିବନାହିଁ ତୁମେ ଭୁଲି
ଅଧ୍ୟବସାୟ ହିଁ ସଫଳତା ବାକ୍ସ
ତାଲାକୁ ପାରିବ ଖୋଲିି ||

କଠିନ ଶ୍ରମ ଓ ଅଧ୍ୟବସାୟ ତ
କେବେ ବ୍ୟର୍ଥ ହୁଏ ନାହିଁ
ମହତ କର୍ମର ଉପହାର ସଦା
ରହଥାଏ ଥୁଆ ହୋଇ ||

କେବଳ ଇଚ୍ଚ୍ଥା ବା କେବଳ ଯୋଜନା
କଲେ କିଛି ଲାଭ ନାହିଁ

ସଫଳତା ଲାଭ ସ୍ବପ୍ନରେ ରହିବ
କୃତିତ୍ବ ମିଳିବ ନାହିଁ ||

ଦିନ ରାତି ଏକ କରି ସ୍ବପ୍ନ ଦେଖ
ଦୃଢ ମନୋବଳ ନେଇ
ଆତ୍ମ ବିଶ୍ବାସରେ ସଂକଳ୍ପେ ଅଟଳ
ରହି କର୍ମ କର ଭାଇ ||

ଲକ୍ଷ୍ୟ ହାସଲର ଯୋଜନା କରିଣ
ତା ମତେ ଯାଅ ଆଗେଇ
ସବୁକାର୍ଯ୍ୟ କଲେ ଯୋଜନାନୁସାରେ
ସଫଳ ହୋଇବ ଭାଇ ||

ଲଭିବ କୃତିତ୍ବ ସମ୍ମାନ ମର୍ଯ୍ୟାଦା
ସର୍ବ କାର୍ଯ୍ୟେ ସିଦ୍ଧି ପାଇ
ତୁମେ ସଫଳତା ଶିଖର ଛୂଇଁବ
ଲକ୍ଷ୍ୟର ହାସଲ ହୋଇ ||